Duhdá Elı́gu Nę́nę́ gha Ɂeɂá kehtsı̨ gha k’áowe ke nezǫ́ néhǝ́ eghálakı̨dá le? Ejǫ denets’ę́ gwahde nı́dé dúle nehǝts’ę́ nats’edı sǫ́ǫ́nı̨.
Duhdá Elı́gu Nę́nę́ gha Ɂeɂá kehtsı̨ gha k’áowe ke eyıa nezǫ́ dene ts’ę́ nats’udı kedı t’á Dene nahǝts’ę́ nádı gha k’áowe henédıkı̨rı̨tł’é. Bezı́ Colette Langloıs heredı eyıa Duhdá Elı́gu Nę́nę́ gha Ɂeɂá kehtsı̨ gha k’áowe ke gogha eghálaeda.
Dene ts’ę́ nádı k’áowe hé yegha eghálaeda ke hé Duhdá Elı́gu Nę́nę́ gha Ɂeɂá kehtsı̨ ke nezǫ́ neghálakedá le nı́dé k’áowe gots’ę́ gwahde nı́dé nahegha Duhdá Elı́gu Nę́nę́ k’áowe ke gots’ę́ gode gha. K’áowe negha Duhdá Elı́gu Nę́nę́ k’áowe ke ts’ę́ gode kúlú nahǝts’ę́ nákedı́le nı́dé nahǝgha gode yegháda gháré dánı̨́ nı́dé ehkw’ı̨ gha ghadı ghǫ godı Duhdá Elı́gu Nę́nę́ gha Ɂeɂá kehtsı̨ ke gots’ę́ detł’é gha. Duhdá Elı́gu Nę́nę́ gha Ɂeɂá kehtsı̨ gha k’áowe ke Dene ts’ę́ nádı k’áowe kadı́ kúlú edaghǫ yeghákeda dáudı́ nı́dé yeghálakeda gha.
Areyǫné ełę́t’ę beghálats’eda gha deyı́le ǫt’éle. Duhdá Elı́gu Nę́nę́ k’áowe ke ts’ę́ gode kúlú dúwé areyǫné ts’ę́ hęɂę kedı́le gots’ę areyǫné dene ełet’éle ǫt’e. Dırı ayı́ akedı:
- Duhdá Elı́gu Nę́nę́ gha Ɂeɂá kehtsı̨ gha k’áowe ke gogha eghálada t’á ası́ gorake kúlú ayı́ gha dadı́le nı́dé k’ola.
- Dene eyıąlı̨ kǫ́ eghálaeda ke dene eghálaeda erı̨htł’é gháré eghálakedá le nı́dé k’ola.
- Kǫ́ goyı náde gha eghálaeda ke asą́ą goradı kúlú nahǝkewękw’ę́ le nı́dé k’ola.
Dırı Dene ts’ę́ nádı k’áowe hé yegha eghálaeda ke hé gots’ę́ godı wahtsı̨ nı́dé ayı́ eyıa redı łahtare nı́dé dúlé yeghálayeda:
- Ekanı̨́ nı́dé dánı̨ ghǫ ekanı̨́ godı ketsı̨ t’á neghanezǫ́ kakedı gha
- Duhdá Elı́gu Nę́nę́ gha Ɂeɂá kehtsı̨ gha k’áowe ke dedı́ eyıa ełot’e godı kehtsı̨
- Nını hé Duhdá Elı́gu Nę́nę́ gha Ɂeɂá kehtsı̨ gha k’áowe ke hé nezǫ́ ełets’ę́ nahɂá gots’ę ełerachá nı́dé hı̨dó nezǫ́ ełehǝ́ eghálada gha
- Yek’erekı̨lı̨ nekedı
- Nets’ę́ sǫ́ba anade gha
- Duhdá Elı́gu Nę́nę́ gha Ɂeɂá kehtsı̨ gha k’áowe ke dedını eyıa kede begháré eghálats’eda polıcy heredı eyı gháré eghálakeda t’á denets’ę́ nats’edı goɂǫ́ nats’e t’ą́ nezǫ́ akele gha yeghálakeda
- Dene ts’ę́ nádı k’áowe ayı́ nezǫ́ denehǝ eghálakı̨dá le ts’edı godı ts’ehtsı̨̨ gháda gháré dene hé nezǫ́ eghálats’ı̨da ghadı gha
Dırı Dene ts’ę́ nádı k’áowe hé yegha eghálaeda ke hé gots’ę́ godı whahtsı̨ nı́dé nahǝ godı dedenı zǫ goghá ǫt’é dene ası̨́ ts’ę́ kakedı gháı̨le hęɂę dıd̨I nı́dé zǫ.
Nezǫ́ nahe ghálakı̨dá le nı́dé Duhdá Elı́gu Nę́nę́ gha Ɂeɂá kehtsı̨ gha k’áowe ke gha eghálakeda k’é gha k’áowe dáudı́ nı́dé amı̨́ı̨ gogha eghálada ke eyıa gots’ę́ gwahde kúlú nahets’ę́ nakedı́le nı́dé dúlú nahǝts’ę́ naı́dı sǫ́ǫnı t’á ejǫ nats’ę́ gwahde.
Dene ts’ę́ nádı k’áowe Eghálaeda gá
Bet’á gots’ede 1-844-686-6283 (náadı́ le) dáudı́ nı́dé 874-6623 (ejǫ K’átł’odé)
Email: info@nwtombud.ca
Fax: 1-867-874-6250
Mail: PO Box 4297, Hay River NT X0E 1G5