Jądı́zı̨́ ɂedzagh në́n ts’ı̨ nı́é ts’ë́n k’aldhër nets’ë́n nezų́ náłthërle nıdhën-u? Nuwexél yanełtı xadúwı́lé. Ɂaxą nets’ı́dı xa dúwéle t’osą́.
Ɂeyı dëne that’ın yatı t’á Ombud húlye la hutún sı́, Beba Ɂelı́gı́th Dëne Ɂeła Réłtth’ı sı́ ɂeyı la xa dëne néhıłtı̨ sı́, Jadı̨́zı̨́ Ɂedzagh Në́n xa nı́é ts’ë́n k’aldhër t’at’ú dëne ts’énı ɂeghálana sı́ harelyų́ dëne ɂełk’ı́s ɂał thën xa hałnı ɂeyı xa nı́ltı̨ ɂat’e. Colette Langloıs húlye denı t’a Jadı̨́zı̨́ Ɂedzagh Në́n xa Ombud helı̨ xa nı́ltı̨-u, k’an ɂuhdų́ hát’ı la ts’utún ɂat’e.
Ɂeyı Ombud húlye sı́, denı chu t’ą yeba ɂeghádalána chu Jadı̨́zı̨́ Ɂedzagh Në́n xa nı́é ts’ë́n k’aldhër t’at’ú dëne ɂałthën ghą bexél hadı xadúwı́le-u, nı́é ts’ë́n k’aldhër bechëlekuı chu t’ą dëne nı́é ts’ë́n k’aldhër yets’ë́n nezų́ náłthërle yıdhën sı́ ɂeyı ghą ɂeła náı́yaıhełtı séyehı́le xa dëne ts’énı xadúwı́le. Ɂeła yáı́hełtı́ húlı́ bet’óreıdhërle dé, ɂeyı Ombu húlye sı́ yek’áúnetagh-u t’at’ú súghá bek’e ɂeghálada xa yıdhën sı́ ɂeyı ghą ɂerehtł’ı́s hełtsı xadúwı́le. Ɂeyı Ombud húlye jat’u beghálodá hénı-u yatı nı́la dé húlı́ Jadı̨́zı̨́ Ɂedzagh Në́n xa nı́é ts’ë́n k’aldhër hát’u yeghálana relɂı̨le dé, denı bets’ë́n halı̨, hát’e húlı́ ɂeyı hát’ı ombud húlye dën dálı̨ sı́ t’at’ú beghálodá dádı dé hala hát’u nı́é ts’ë́n k’aldé dálı̨ sı́ denı dáı́yıdhënt’á hat’u yeghádálana ɂunt’e.
Dëne harelyų́ ɂełk’ı́s ɂałdhën ghą núdhër dé, nok’e búrenı ɂat’éle. Nı́é ts’ë́n k’aldhër hétł’ás ts’ë́n t’a bets’ekér hę hénı xaıle-u tth’ı harelyų́ dëne ɂełk’ı́s ɂałdhën xaɂąıle. Jat’u t’a yeghálana dé, ɂełtth’ı́le ɂat’e:
- Jadı̨́zı̨́ Ɂedzagh Në́n xa nı́é ts’ë́n k’aldhër bechëlekuı t’ası́ rıkér-u ɂı̨łe néłnı-u t’a t’á ɂı̨le néłnı sı́ hánéłnıle
- T’ą health centre dólye ɂeghálana sı́ t’a ghár ɂeghálana xaɂą ɂeyı ghár ɂeghálanaıle
- T’ą housıng authorıty húlye xa ɂeghálana bexél holnı rı̨́łdzágh húlı́, nuréłtth’ąıle
Neba nezų́ nets’édıle t’á ɂeyı Ombud húlye hálını dé, ja ne to xa:
- T’a t’á t’at’ú nets’édı xa néts’edı sı́ ɂeyı t’é nezų nexél hadı xa
- Jadı̨́zı̨́ Ɂedzagh Në́n xa nı́é ts’ë́n k’aldhër t’at’ú nets’édı xa hénı sı́, ɂeyı nayenełɂı̨ nadlı̨
- Nën chu Jadı̨́zı̨́ Ɂedzagh Në́n xa nı́é ts’ë́n k’aldhër chu té nezų́ ɂełnurułnı́ ɂane-u, yunéth haɂa dé nezų́ ɂeła ɂeghálohna xa
- Bek’e nasłı̨ néts’edı xa tósą́
- Tsamba netł’á natł’ı́r
- Jadı̨́zı̨́ Ɂedzagh Në́n xa nı́é ts’ë́n k’aldhër beghár ɂeghálada xa yatı thela sı́, ɂeyı ɂedų́ ɂanayı́le bet’á harelyų́ dëne ɂełk’ı́s ɂaldhën xa
- Ɂeyı Ombud húlye t’anódhër té nezų́ yek’aunetágh-u, t’anódhër sı́ ɂełtth’ı ɂályá ɂat’e hénı
Ɂeyı Ombud húlye bets’ë́n yaıtı dé, ɂeyı beghą yuɂáné dëne xél hadı ɂat’éle. T’a ghą nuwe xél yaıłtı sı́, yuɂáné dëne hálı́dı xaıle në́n ɂę́ dını́lásı́.
Jadı̨́zı̨́ Ɂedzagh Në́n xa nı́é ts’ë́n k’aldhër bets’ı̨ offıce húlye ɂeyı ghą t’ası́ neba ɂełtth’ı́le dé, ɂeyër t’ą k’áldhër helı̨ tó t’ą ɂeyër ɂeghálana sı́, ɂeyı beghą bexél yanełtı rı́łdzágh, t’a neba ɂełtth’ı́le sélne xa. Ɂeyı hánejá húlı́ ɂałų́ hát’u háɂą dé, hánuwélını xadúwı́lé-u, ɂaxą nets’ı́dı xadúwı́le tosą́.
Ɂeyı Ombud húlyé jat’ú bets’ë́n yanełtı xadúwı́le:
Nánı́le-u beyé yatı: 1-844-686-6283 (toll-free) hát’ele dé 874-6623 (ın Hay Rıver)
Computer yé ją ts’ë́n retł’ı́s: info@nwtombud.ca
Beyé yatı t’á ɂerehtł’ı́s dëneba nı́lchuth: 1-867-874-6250
Ɂerehtł’ı́s ts’érélyı t’á ɂerehtł’ı́s ją ts’ë́n nı́lchuth: PO Box 4297, Hay River NT X0E 1G5