Dǫne GNWT gha eghàlagı̀dedǫ hotı nezı̨ nets’ǫ̀ eghàlagı̨̀nda-le xè weghǫ nànèwo nı̀ı̀? Gots’ǫ̀ goı̨de ha dı̀le. Nets’àts’edı ha dı̀le hǫnı̨.
Dı̀ı dǫne Ombud wı̀yeh sı̀ı dǫne tanı wheda lanı̀ eyıts’ǫ dǫne wets’ǫ̀ ehkw’ı eghàlahoda gha dǫne gha ası̀ı yı̀danàtadǫ hǫt’e. Ek’ètehtsodǫ t’a Colette Langloıs akwełǫ̀ dı̀ı hanı la k’e wheda gha la k’e nègı̨̀tı̨.
Dı̀ı dǫne tanı wheda sı̀ı wechekè xè edàanı̀ government dechekè ts’ǫ̀ eghàlada sı̀ı ehkw’ı-le dè, dı̀ı dǫne tanı wheda sı̀ı goxè segole ha wela hǫt’e eyıts’ǫ ełexè gogede agogele t’à ełexè segogele ha gehdzà. Dı̀ı hanı̀ ełexè gogede t’à dexè segogele haàdı̀ı̀ nı̨dè, dı̀ı dǫne tanı wheda elı̨ sı̀ı ası̀ı yıdànàta ha dı̀le, eyıts’ǫ yıghǫ dı̀ı hanı̀ welè dıı̀ t’à yıghǫ nı̨htł’è yehtsı̨ ha dı̀le. Dı̀ı dǫne tanı wheda elı̨ sı̀ı edàanı̀ nàowo hòlı̨ sı̀ı GNWT yık’è eghàlada ayele hadı̀, hanı̀kò, ǫhk’èa dı̀ı dǫne tanı wheda nàowo yehtsı̨ dè GNWT dedı̨ whacho hagı̨̀wǫ t’à wek’è hòewı agele ha dè hahot’ı̨.
Ats’ǫ ehkw’ı eghàlats’eda ha wı̨ı̨̀dı nı̨le. Dǫne wetąt’e Government dǫne gıts’ǫ̀ ełexèt’e eghàlahoda gha axodı nı̨le. Dı̀ı hanı̀ dǫne ts’ǫ̀ ehkw’ı eghàlahoda-le dè awèts’edı;
- GNWT chekeè ası̀ı hąąle gı̨hdı hò hayele ha nı̨wǫ-le, eyıts’ǫ edàanı̀ghǫ hadı-le
- Nàedık’èzhǫ kǫ̀ dǫne eghàlada sı̀ı nàowo k’è eghàlada-le
- Dǫne kǫ̀ gha eghàlada sı̀ı gǫndı weghàneɂa ha węę̀dzà hanı̀ko ehkw’ǫ-le
Dı̀ı dǫne tanı wheda wets’ǫ̀ gahde t’à dı̀ı hanı ası̀ı mǫhdaà hade ha hǫnı:
- Nàowo hòlı̨ t’à nexı̀dı sı̀ı weghǫ deghà hanegedı ha
- GNWT nàowo yehtsı̨ ı̨lè sı̀ı achı̨ gıghǫ nanı̀wo t’à gıghǫ nanı̀dè
- Nı̨ eyıts’ǫ GNWT hotı deèɂǫ̀ nezı̨ ełèakw’ǫ eyıts’ǫ ı̨da nı̨dè nezı̨ ełexè eghàlaàhde ade ha
- Dǫne nets’ǫ̀ ehkw’ı-le eghàlaı̨̀da sı̀ı, nets’ǫ̀ nahòele ha deghǫ nahòele ha dı̀le
- Nets’ǫ ɂeèdı̀ ha
- GNWT gıts’ǫ nàowo dǫne gha deèɂǫ̀ nezı̨ adle gha ładı̨ agele ha
- Dǫne tanı wheda elı̨ sı̀ı ası̀ı hazhǫ yıdànàta xè dǫne hazhǫ hotı nızı̨ wets’ǫ̀ eghàlada gha yıxòehdı
Dǫne t’ala dı̀ı dǫne tanı wheda wets’ǫ nı̨htł’èkǫ̀ ts’ǫ̀ gogede nı̨dè, dǫne wı̨ı̨̀zı hagets’edı nı̨le. Nı̨ ayı̀ı weghǫ goı̨de sı̀ı dǫne ładı̨ ts’ǫ̀ weghǫ gots’ede-le, nı̨ haı̨̀dı nı̨dè zǫ.
Government gıts’ǫ nı̨htł’èkǫ̀ weghǫ nànèwo dè, nı̨ akwełǫ̀ akǫ k’àowo hanı̀-le dè akǫ dǫne eghàladadǫ akwełǫ̀ gıts’ǫ̀ goı̨de. Nezı̨ gıxè gonede-le dè, gots’ǫ̀ gonede ha dı̀le, eyıts’ǫ nets’àts’edı ha dı̀le hǫnı̨.
Dı̀ı gha tanı wheda elı̨ dǫ dı̀ı hanı̀ wets’ǫ gahde ha dı̀le:
Tł’ı Wet’à Gots’ede: 1-844-686-6283 (nàts’ehdı-le) or 874-6623 (Hatł’oòdeh)
Satsǫ̀ wet’à ets’eètł’è: info@nwtombud.ca
Nı̨htł’è haàde: 1-867-874-6250
Nı̨htł’è: PO Box 4297, Hay River NT X0E 1G5